Personalizar unha web non debería obrigarte a escoller entre dúas opcións malas: aceptar un deseño pechado ou enfrontarte a centos de controis.
En fala tomamos outro camiño.
Deseño por escollas
En Aparencia atopas opcións preparadas para a cabeceira e o pé de páxina. Podes decidir como se presenta o nome, onde vai o menú e que estrutura pecha o sitio.
Non editas unha plantilla nin moves caixas dentro dunha cuadrícula invisible. Ves alternativas claras, escolles unha e gárdala.
O mesmo ocorre co blog. As entradas poden aparecer en tarxetas, en dúas columnas, en fichas grandes, en filas, cunha composición de revista, en mosaico ou como unha lista de titulares.
Un blog de fotografía e outro de textos longos non necesitan a mesma portada. O contido cambia; a ferramenta adáptase sen deixar de ser simple.
Seis paletas, ou as túas cores
Fala 1.0 inclúe seis paletas preparadas. Hai opcións claras, escuras, neutras, cálidas e máis expresivas.
Se ningunha encaixa contigo, podes partir dunha delas e cambiar as cores principais. O sistema utiliza seis funcións —fondo, superficie, texto, texto secundario, cor principal e acento— para que un cambio se aplique con coherencia a todo o sitio.
Isto evita ter un azul nun botón, outro case igual nunha ligazón e un terceiro nunha páxina que xa nin lembras como fixeches.
As paletas preparadas están comprobadas para manter un contraste lexible. Coas cores personalizadas, o panel avísate se unha combinación pode dar problemas.
Nove combinacións de letras
Tamén podes escoller entre nove parellas tipográficas. Unha letra para os títulos e outra para o texto, combinadas de antemán para funcionar xuntas.
Todas están aloxadas en fala. O navegador non ten que pedírllelas a Google nin a outro servizo cada vez que alguén visita a túa web.
Non tes que saber que familias combinan ben, que pesos fan falta ou se inclúen os caracteres do galego. Escolles a sensación que buscas: máis clásica, editorial, amable, técnica ou expresiva.
Probar non compromete nada
As escollas de Aparencia non cambian o que escribiches. Podes aplicar unha paleta, ver o resultado e volver á anterior. Podes probar outra disposición do blog e recuperar a que tiñas.
O sistema limita algunhas decisións, si. Faino para que unha cabeceira continúe funcionando no móbil, os textos se lean e as actualizacións futuras non desfagan a web.
Pero as capacidades de deseño non deixarán de aumentar a futuro.
Liberdade suficiente para que o sitio sexa teu. Regras suficientes para que personalizalo non se acabe sendo outro traballo.
Fala 1.0 abre o 20 de setembro. Podes anotarte na lista de agarda e avisámoste!
Deixa unha resposta