Deseñar unha web concreta e deseñar un sistema para máis de 400 sitios son traballos distintos.
Nun proxecto normal coñécese o contido, a estrutura e o obxectivo da páxina. En Fala.gal non sei que publicará cada persoa, cantas seccións terá o seu sitio nin que combinación de bloques utilizará.
Por iso non podía deseñar páxinas pechadas. Tiña que deseñar regras.
Un tema para toda a rede
O novo tema chámase fala e será a base común de todos os sitios.
Que exista un único tema non significa que todas as webs teñan que parecer iguais. Significa que compartirán a mesma estrutura técnica, o mesmo sistema de edición e as mesmas regras básicas.
Isto permite que un cambio de accesibilidade, unha corrección ou unha mellora se aplique de maneira coherente.
O tema inclúe 33 patróns de sección e catro modelos de páxina completos. Un patrón é unha combinación preparada de bloques: por exemplo, unha presentación con texto e imaxe, unha chamada á acción ou unha listaxe de contidos.
A idea é que ninguén teña que comezar sempre cunha páxina en branco.
A cor como función
No tema non traballo pensando só en cores concretas. Non hai simplemente “un azul” ou “un gris”.
Hai seis funcións: fondo, superficie, texto, texto secundario, cor principal e acento.
A superficie é a cor que aparece en caixas ou zonas diferenciadas. A principal identifica botóns e elementos destacados. O acento serve para pequenos detalles.
Esta organización permite cambiar o aspecto completo dun sitio substituíndo os valores desas seis pezas, sen ter que revisar bloque por bloque.
O tema inclúe catro variacións: Atlántica, Terra, Noite e Ningunha.
Atlántica parte da cor de marca de Fala.gal, o azul #0169A4. Terra utiliza unha combinación máis cálida. Noite ofrece unha base escura. Ningunha deixa unha aparencia máis neutra para quen queira personalizar o sitio.
A estrutura é a mesma. O que cambia é a paleta e a sensación visual.
O contraste non é unha opinión
Un texto gris claro sobre fondo branco pode quedar ben nunha captura. Tamén pode ser difícil de ler nun móbil ao sol ou para unha persoa con problemas de visión.
Por iso comprobei oito combinacións críticas en cada paleta. Todas as variacións cumpren o nivel AA de contraste.
Ese nivel é un criterio medible de accesibilidade. Non depende de que unha combinación pareza bonita ou suficiente a simple vista.
Durante o deseño houbo dúas cores que non pasaron as comprobacións. Un ámbar quedaba nunha relación de contraste de 2,7:1. Un gris chegaba a 4,4:1, por debaixo do mínimo necesario nalgúns usos.
As dúas foron substituídas.
Nunha web concreta un erro de contraste afecta esa páxina. Nun tema utilizado por centos de sitios, o mesmo erro multiplícase por toda a rede. Por iso aquí non ten sentido facer excepcións.
Tipografías que funcionan
O sistema inclúe 12 tipografías autoaloxadas. Son libres e conteñen os caracteres necesarios para escribir correctamente en galego.
As tipografías de marca serán Fraunces para os títulos e Inter para os textos.
As fontes están gardadas na propia infraestrutura de Fala.gal. Non se cargan desde Google Fonts nin desde outro servizo externo.
Isto evita chamadas a terceiros cada vez que alguén visita unha web e dá máis control sobre a privacidade e o rendemento.
Tamén comprobei que as tipografías inclúan acentos e caracteres como o ñ e o ç. Parece unha comprobación básica, pero non todas as fontes dispoñibles en internet teñen un conxunto completo de caracteres.
A futuro, é posible que se integren máis e mesmo se permitan subir tipografías personalizadas. Estamos preparando a versión 1.0. Todo se andará.
Elixir sen enfrontarse ao baleiro
O novo sistema non pretende impedir a personalización.
Cada persoa poderá escoller un estilo, cambiar cores e seleccionar tipografías. O que desaparece é a necesidade de construír desde cero a estrutura básica dunha web.
Os patróns e modelos funcionan como puntos de partida. Pódense editar, eliminar ou reorganizar.
Isto reduce o risco de crear páxinas incoherentes por non saber por onde empezar e, ao mesmo tempo, mantén o contido no editor estándar de WordPress.
As capturas que acompañarán este artigo non son propostas teóricas. Corresponden ao tema e aos patróns que xa están construídos.
O seguinte paso é probalos en sitios reais. Aí veremos que combinacións funcionan ben con contidos de varios anos e que partes hai que corrixir antes de iniciar as migracións.
Así é como se ven patróns e modelos
Ollo, non significa que a túa web se vexa así. Nin sequera que os teñas que usar.
Son, simplemente, propostas para poder comezar con algo xa feito ou con estruturas optimizadas útiles e habituais xa creadas e que ti simplemente teñas que cambiar os contidos.
