Claude Fable 5 (e Opus 5 4.8 cando se esgotan os tokens) é o meu compañeiro na reconstrución de Fala.gal.
Prefiro dicilo con claridade porque hai persoas ás que isto lles xera desconfianza e si, eu entendo que existan motivos para tela. Estas ferramentas poden equivocarse, producir código defectuoso (aínda que non máis defectuoso que o que poida facer eu, para que mentir) e presentar como certa información que non o é.
Este é un bo tema porque son consciente do debate social que suscita a IA. Así que vou dar o meu punto de vista e como se usa aquí.
A IA non toma as decisións do proxecto. Utilízoa como ferramenta de traballo para que unha rede pequena e sen orzamento poida construír pezas a medida.
Para que a uso
Hai tres áreas principais: auditoría, programación e migración.
Na auditoría axuda a revisar información de centos de sitios e detectar patróns. Permite agrupar configuracións, localizar usos repetidos e preparar listaxes que logo comprobo.
Exemplo: extraer datos de publicación, uso e interacción da rede.
Utilízoa tamén para escribir e revisar partes do código. Isto non significa pedir unha función e instalala directamente. O código debe entenderse, probarse e adaptarse á rede.
A terceira área son as migracións. Cando centos de páxinas utilizan estruturas diferentes, é necesario preparar procesos que transformen contido de maneira repetible.
A IA pode axudar a propoñer eses procesos e a analizar casos pouco habituais.
Para que non a uso
Non decide que sitios se arquivan, que funcións desaparecen nin como se avisa ás persoas usuarias.
Tampouco decide que contido merece conservarse ou que risco é aceptable.
Esas decisións tómaas unha persoa e deben quedar escritas e razoadas.
A ferramenta pode axudar a comparar opcións, pero non asume a responsabilidade.
O argumento económico
Antes, cando Fala.gal necesitaba unha función, a solución máis rápida adoitaba ser instalar un plugin.
O problema é que un plugin pode incluír moitas funcións que a rede non necesita. Tamén crea unha dependencia dun desenvolvedor externo, dun sistema de actualizacións e, ás veces, dunha licenza.
Co apoio das ferramentas actuais, escribir unha peza pequena que faga exactamente o necesario é máis viable.
Isto cambia a decisión económica.
Non se trata de substituír unha persoa programadora por unha máquina. Trátase de que un proxecto voluntarista poida permitirse funcións propias que, doutro xeito, non se desenvolverían.
Funcións concretas
Un exemplo é a integración de Bandcamp, utilizada 278 veces na rede.
En lugar de manter unha extensión grande para unha necesidade concreta, pódese crear un bloque pequeno que permita incrustar ese contido.
O mesmo criterio aplicarase ás iconas, aos botóns para compartir, ao aviso de cookies, ao SEO básico e á simplificación do panel de administración.
O obxectivo é que moitas das necesidades queden cubertas polo propio WordPress.
O código a medida debe limitarse ao que realmente falta.
Menos código tamén pode significar menos risco
Escribir software propio non elimina os problemas de seguridade.
Pero unha peza pequena, cunha función clara e sen opcións innecesarias, resulta máis fácil de entender (para min polo menos) e revisar que unha extensión xenérica con decenas de módulos.
Tamén reduce as dependencias. Non hai que agardar a que un terceiro adapte a súa ferramenta nin conservar funcións que non se utilizan.
Isto só funciona se o código se proba e se mantén. A medida non é automaticamente mellor. É mellor cando permite ter menos pezas e controlalas.
Os límites
A intelixencia artificial equivócase.
Pode propoñer unha función que parece correcta e falla nun caso concreto. Pode introducir problemas de seguridade ou empregar métodos que xa non son recomendables.
Por iso todo debe revisarse e probarse nunha copia da rede antes de chegar ao servidor real.
Tamén é necesario comprender o resultado. Non serve aceptar código que ninguén sabe explicar.
A responsabilidade segue sendo sempre de quen o fai (humano!).
Que significa para Fala.gal
A IA permite reducir a dependencia de plugins xenéricos e construír ferramentas máis pequenas para necesidades reais da rede.
Non fai do proxecto un sistema automático nin substitúe a participación da comunidade.
As decisións sobre Fala.gal seguirán baseándose nos datos, nas probas e no que expresen as persoas usuarias.
A ferramenta acelera parte do traballo. Non decide o rumbo.
