Desde 2020, fala.gal permitiu crear case 500 webs e blogs en galego, de balde e sen coñecementos técnicos. Blogs persoais, asociacións, revistas, proxectos musicais, aulas… Unha pequena rede que medrou máis do que esperabamos e que hoxe é un anaco de internet en galego que paga a pena coidar.
E precisamente por iso toca parar e renovala a fondo.
Se vos gustan os números de versión: todo o que existe ata hoxe foi, na práctica unha (demasiado) longa fase beta que funcionou como puido. Neste artigo cóntovos o que atopamos, o que imos facer e como podedes participar.
O que atopamos ao mirar dentro
Nos últimos meses fixemos unha auditoría completa da rede, e o retrato é claro:
A rede funciona, pero acumulou anos de crecemento sen orde. De todos os sitios creados, arredor dun cento úsanse con regularidade; outros moitos quedaron parados e unha boa parte creáronse e nunca chegaron a arrancar.
Conviven ademais temas e extensións moi distintos entre si, o que fai a rede difícil de manter e desigual para quen a usa: cada sitio funciona á súa maneira, e axudar a alguén implica primeiro descubrir que ten instalado.
A conclusión non foi «isto hai que pechalo», senón a contraria: hai contido e comunidade pero só será sostible cun cambio total de modelo.
Os tres principios da renovación
Simplicidade radical. Un só sistema de deseño para toda a rede, un conxunto coidado de funcións e fóra todo o que estorba. Menos pezas, menos avarías, máis sinxeleza, máis velocidade.
Feito a medida. No canto de acumular extensións xenéricas e pesadas (plugins), as funcións da rede serán pezas propias, programadas a medida, lixeiras e pensadas para fala.gal. As ferramentas actuais coas que contamos axúdanos a construílas e mantelas.
Ben feito desde o primeiro día. Cada sitio novo nacerá xa con xeito: cun asistente de creación guiado, un deseño coherente e todo o esencial configurado.
Que vai cambiar para quen ten un sitio
- Un deseño novo e coidado, con varios estilos entre os que escoller (e liberdade para poñer as túas cores e tipografías). O contido é teu e segue sendo o centro.
- Edición máis sinxela: escribir e publicar sen perderse en menús. Un panel novo, claro e en galego, pensado para persoas.
- Un asistente de alta para crear un sitio novo en poucos pasos, con arranques de exemplo segundo o que queiras montar (web dunha asociación, blog persoal, proxecto profesional…).
- Máis seguridade e mellor rendemento, con menos carga técnica invisible.
E igual de importante, o que non vai cambiar: fala.gal seguirá sendo gratuíta, en galego e sen publicidade.
O contido publicado nestes anos é patrimonio da lingua: o criterio por defecto é conservalo. Os sitios inactivos, no seu caso, arquivaranse sempre despois de contactar con quen os creou.
Como o imos facer
Farémolo en 5 fases.
- Escoitar e preparar a base. Preguntámoslle á comunidade e deixamos listo o alicerce técnico do novo sistema.
- Piloto. Uns poucos sitios voluntarios estrearán o novo deseño para probalo en real e afinalo.
- Sitios novos. Toda web creada a partir dese momento nacerá xa no sistema novo, co asistente de alta.
- Migración. Os sitios activos irán pasando ao novo modelo por quendas, acompañados. Cada quen poderá previsualizar como quedaría o seu sitio. Este punto é especialmente delicado e sabemos que algúns sitios romperán, cambiarán o deseño ou deixarán de funcionar. Queremos deixalo ben claro desde o inicio. É o prezo a pagar. Axudaremos a todas as persoas a que o impacto sexa o menor posible.
- Peche da renovación e posta a punto final da infraestrutura.
Dámonos un prazo que rematará o 31/12/2026 para completalas.
Se tes un sitio na rede, revisa o correo
Todas as persoas cun sitio en fala.gal recibiredes un correo desde boletin@fala.gal: unha invitación persoal a contarnos en que punto está o voso sitio, que botades en falta e se queredes ser dos primeiros en probar o novo sistema.
É a peza máis importante desta primeira fase. Se non o vedes, mirade no spam e marcádeo como correo lexítimo.
Seguimos.
