Publicar na túa casa non significa pechar a porta.
Unha web dáche un enderezo estable e un arquivo propio. As redes sociais, os servizos de vídeo e o correo axudan a que o contido circule. Non hai que escoller só unha cousa.
Fala 1.0 conecta esas pezas sen converter o sitio nunha colección de extensións.
Compartir onde xa está a xente
Ao final das entradas podes amosar botóns para compartir en WhatsApp, Telegram, Facebook, X, Bluesky e Mastodon. Tamén por correo, ou copiando a ligazón.
Podes activar ou retirar a barra desde os Axustes. Non cambia o contido nin depende dunha conta de fala nesas plataformas.
A función é pequena, pero importante: facilita que unha publicación saia do sitio sen deixar de apuntar ao seu enderezo orixinal.
Vídeos, mapas, música e máis
Para incorporar contido externo non tes que pegar código.
Utilizas o bloque de Incrustado, pegas o enderezo e fala prepara o resultado. Ademais dos servizos que WordPress xa admite, a rede engade compatibilidade con 27 provedores: mapas, rutas, podcasts, música, arquivos, formularios e publicacións doutras redes.
Entre eles están Bandcamp, Google Maps, uMap, iVoox, Spotify, PeerTube, Mastodon, Pixelfed, Canva ou MeteoGalicia. YouTube e Vimeo tamén se poden incorporar mediante o soporte nativo de WordPress.
O recurso non carga ata que a persoa visitante acepta velo. Así podes enriquecer unha entrada sen conectar de inmediato cada visita con todos eses servizos.
O teu sitio pode estar no fediverso
Se o solicitas, o sitio pode funcionar como unha conta do fediverso.
Un blog chamado caderno.fala.gal terá un enderezo do tipo @caderno@caderno.fala.gal. Alguén poderá buscalo e seguilo desde Mastodon ou outra plataforma compatible.
Cada entrada nova chegará ás persoas que o sigan, sen que teñas que copiala a man nunha conta separada.
A activación é voluntaria e faise por sitio. Se non che interesa, non se carga esa integración nin cambia nada na túa web.
Unha newsletter conectada ao teu MailerLite
Tamén podes recoller subscritores para o teu propio boletín.
Conectas unha conta de MailerLite, escolles o grupo no que queres gardar os contactos e personalizas o formulario. Podes colocalo onde queiras cun bloque ou facer que apareza ao final de todas as entradas.
fala recolle a subscrición e envía o contacto ao teu MailerLite. Os correos do boletín envíaos o teu servizo, non o servidor da rede.
O formulario inclúe consentimento e recomendamos activar a confirmación dobre en MailerLite.
A web como centro
Compartir, incrustar, federar e enviar un boletín son catro camiños distintos. Todos parten do mesmo lugar: o contido publicado no teu sitio.
As redes poden axudar a movelo. O correo pode facer que alguén volva. O fediverso pode levar cada entrada a novos lectores. Pero a peza que os conecta segue tendo un enderezo aberto, enlazable e organizado.
Fala 1.0 abre o 20 de setembro. Anótate na lista de agarda e avisarémoste.
Deixa unha resposta