Quero explicar con claridade por que Fala.gal precisa unha renovación completa e que consecuencias vai ter este proceso.
Non estamos falando só dunha actualización tecnolóxica. A renovación implicará tamén cambios visuais, novos sistemas de edición e unha reorganización profunda da maneira na que se constrúen e manteñen os sitios da rede.
Todos os sitios se verán afectados, aínda que non na mesma medida. Algúns conservarán boa parte do seu aspecto actual e outros necesitarán unha adaptación máis importante.
No artigo no que anunciei esta nova etapa de Fala.gal xa resumín as razóns principais da renovación e o roadmap previsto para os próximos meses.
Despois da súa publicación xurdiron varias dúbidas que considero necesario aclarar.
Estas dúbidas saíron dunha enquisa ás persoas usuarias da rede. Estou moi agradecido pola participación e polo nivel das respostas. O feedback está sendo moi útil e están aparecendo propostas interesantes que estudaremos para incorporalas ao proxecto.
O problema actual: dous sistemas de edición distintos
Na rede conviven agora mesmo dous xeitos diferentes de xestionar o deseño dos sitios de WordPress.
Por unha banda, está o sistema clásico, baseado en temas tradicionais e no Personalizador de WordPress.
Por outra, está o sistema máis recente, baseado no Editor do sitio e nos temas de bloques.
Este segundo sistema xa leva varios anos dispoñible, pero durante as súas primeiras etapas ofrecía poucos bloques e unhas posibilidades de deseño bastante limitadas. Para compensar esas carencias fóronse instalando plugins adicionais, tanto gratuítos como comerciais, que engadían novos bloques e funcionalidades.
O problema é que esas solucións se foron acumulando sobre unha base que non estaba preparada para soportar toda esa complexidade.
O resultado é unha plataforma na que conviven demasiadas tecnoloxías, demasiados sistemas de edición e demasiadas dependencias externas.
Unha plataforma difícil de manter
Un tema de WordPress controla boa parte do aspecto visual dun sitio: a estrutura das páxinas, os encabezados, os menús, as tipografías, as cores e outros elementos de deseño.
Na rede hai sitios construídos con temas clásicos como GeneratePress, Astra, Kadence, Sydney, Go e outros similares. Ao mesmo tempo, tamén existen sitios que empregan temas de bloques e o Editor do sitio.
A isto hai que engadir unha cantidade considerable de plugins:
- plugins comerciais;
- plugins gratuítos;
- plugins que engaden bloques;
- plugins que incorporan funcionalidades concretas;
- plugins activos só nalgúns sitios;
- código de terceiros difícil de actualizar e manter.
Esta combinación converteu a plataforma nun sistema excesivamente fráxil. A realidade é que moitas partes están collidas por fíos.
Esa é a realidade. E se funciona é porque WordPress é extremadamente sólido. Para que logo digan…
Agora mesmo é moi difícil mellorar a rede ou introducir cambios importantes sen correr o risco de romper algunha funcionalidade noutros sitios.
Na práctica, gran parte do traballo técnico limítase a manter os compoñentes actualizados e aplicar correccións de seguridade.
A seguridade xa non pode ser secundaria
Un deseño pode estar máis ou menos actualizado e unha interface pode ser mellorable. Iso é asumible durante un tempo.
Os problemas de seguridade non.
Xa tivemos que realizar intervencións urxentes porque algunhas contas de administración de sitios concretos foron vulneradas.
Non se comprometeu a administración global da rede nin a conta de superadministración, pero si se accedeu a determinados sitios e utilizáronse para publicar ou distribuír contido de spam, apostas online e ligazóns a web de p*rn*grafía.
Falarei con máis detalle da seguridade noutro artigo, pero esta situación confirmou que non podemos seguir mantendo indefinidamente a estrutura actual.
A renovación non é só unha cuestión estética ou de modernización. É tamén unha medida necesaria para reducir riscos e garantir a continuidade da plataforma.
Un único sistema baseado en bloques
A nova versión de Fala.gal utilizará un único sistema para editar e deseñar os sitios.
Todo estará baseado en temas de bloques e no Editor do sitio de WordPress.
En concreto, nun só tema. Un tema sinxelo e creado a medida para fala.gal.
O Personalizador clásico deixará de utilizarse. As páxinas, os menús, os encabezados, os pés de páxina e o resto dos elementos visuais construiranse mediante bloques.
Tamén se eliminarán a maior parte dos plugins de terceiros que se utilizan actualmente.
As funcionalidades principais destes plugins serán substituídas, sempre que sexa posible, por solucións creadas especificamente para Fala.gal.
Isto permitirá ter unha plataforma máis coherente, máis segura e moito máis fácil de manter.
Tamén facilitará a incorporación de opcións que as persoas usuarias levan solicitando durante os últimos anos.
Que sitios se verán máis afectados
Os sitios que xa utilicen temas de bloques ou temas oficiais recentes de WordPress serán os que menos cambios necesiten.
Pola contra, os sitios construídos con temas clásicos como GeneratePress, Astra, Kadence, Sydney, Go ou outros temas baseados no Personalizador terán que migrarse ao novo sistema.
Eses temas deixarán de estar dispoñibles dentro da rede.
Intentaremos automatizar a maior parte do proceso de migración, pero non sempre será posible conservar o deseño actual.
Nalgúns casos perderanse configuracións visuais ou será necesario reconstruír determinadas partes do sitio.
Despois da migración ofreceremos soporte na medida do posible ás persoas que necesiten revisar, adaptar ou volver configurar o aspecto da súa web.
Somos conscientes de que este cambio pode resultar incómodo, especialmente para quen leva anos utilizando o mesmo deseño.
Non é unha decisión tomada á lixeira. É unha medida necesaria para que Fala.gal poida seguir funcionando, mellorar e crecer nos próximos anos. É un cambio de futuro antes de que sexa tarde.
Como imos abordar o problema
Os principais obxectivos desta renovación son claros:
- unificar o sistema de edición;
- eliminar dependencias innecesarias;
- reducir o uso de plugins de terceiros;
- mellorar a seguridade;
- facilitar o mantemento;
- permitir o desenvolvemento de novas funcionalidades;
- construír unha base tecnolóxica estable para os próximos anos.
A estrutura actual permitiu que Fala.gal funcionase durante tempo, pero chegou ao seu límite.
Para que a rede poida avanzar, ser realmente útil e ofrecer un servizo sostible, é necesario reconstruír boa parte da súa base técnica.
Ese é o problema que temos diante e esta é a maneira na que o imos resolver.
Se tes un sitio na rede, cóntame
Nada disto se decide ben desde a administración da rede. Por iso a enquisa segue aberta: interésame saber como usas o teu sitio, que botas en falta e que non podería romper baixo ningún concepto.
Tamén busco sitios voluntarios para probar o novo sistema antes que ninguén. Se che apetece, dimo por aí ou escribe a soporte@fala.gal.
No seguinte artigo conto o que pasou cos problemas de seguridade que mencionei máis arriba: que se publicou, como se entrou e que se fixo.
