Dos 433 sitios vivos da rede, arredor de 235 están fríos e uns 90 están mornos.
Ademais, 262 creáronse e case nunca se editaron.
É un dato incómodo, pero hai que telo en conta para renovar Fala.gal. Manter centos de sitios abandonados como se estivesen activos ten un custo técnico.
A solución máis fácil sería borrar. Non o vou facer.
Un sitio parado pode seguir tendo valor
Un blog que leva anos sen actualizarse pode conservar artigos, fotografías ou información que segue sendo útil.
Ese contido continúa sendo galego publicado en internet.
Hai pouco contido dixital na nosa lingua. Eliminar automaticamente unha web só porque deixou de actualizarse sería restar aínda máis.
Tamén hai sitios que nacen para un proxecto concreto e cumpren a súa función durante un tempo. Que non reciban novas entradas non significa que o publicado deba desaparecer.
Por iso o criterio por defecto será conservar.
Arquivar non é borrar
Algúns sitios inactivos poderán pasar a un estado de arquivo.
Arquivar significa que o contido continúa dispoñible para a lectura, pero o sitio deixa de funcionar como unha web activa.
O sitio deixará de recibir cambios ordinarios e non necesitará manter todas as funcións de edición activas.
O contido non desaparece.
Isto permite reducir a carga de mantemento sen eliminar publicacións que forman parte da historia da rede.
Antes de arquivar, avisaremos
Non se arquivará un sitio sen intentar contactar antes coa persoa que o creou.
O aviso explicará a situación e permitirá confirmar que se quere manter activo.
Se a persoa responde que quere continuar utilizando a web, manterase activa e entrará no proceso de migración correspondente.
Non será necesario xustificar a decisión nin demostrar unha frecuencia mínima de publicación.
Como recuperar un sitio arquivado
Un sitio arquivado poderá recuperarse se a persoa responsable quere volver utilizalo.
Antes de reactivalo haberá que revisar o seu estado e adaptalo ao sistema actual da rede.
Non se restaurarán temas e plugins antigos que xa non formen parte de Fala.gal. O contido volverá dentro da base común dispoñible nese momento.
Casos nos que si se borrará
O criterio de conservación non se aplica ao spam.
Tamén se eliminará contido ilegal cando corresponda e os sitios cuxa persoa responsable solicite expresamente o borrado.
Estas excepcións non cambian a regra xeral: a inactividade, por si soa, non será motivo para borrar unha web.
Por que isto debe explicarse antes
Sería máis doado facer limpeza primeiro e dar explicacións despois.
Non sería correcto.
Os sitios pertencen ás persoas que os crearon e conteñen traballo que pode seguir tendo valor. Calquera cambio no seu estado debe comunicarse antes.
Se tes un sitio parado e queres mantelo, avisa a soporte@fala.gal. Con dicilo é suficiente.
Deixa unha resposta